Wilayatul Fakih Ci gaban Wilayar Manzon Allah da Ahlul Baiti (A.S.) Ce

A cewar rahoton Kamfanin Dillancin Labaran Hauza, Mataimakin shugaban Hauzar Qom a sashen bincike Hujjatul Islam wal Muslimin Hassan Turkashwand ya bayyana hakan ne a taron dare da ake gudanarwa a Iran a maukibin Shahidan Ɗalibai da Malaman Hauza.

Hujjatul Islam Turkashwand ya bayyana cewa tsarin Jamhuriyar Musulunci ta Iran an gina shi ne bisa fahimtar tauhidi, kuma Wilayatul Faƙih ci gaba ne na wilayar Manzon Allah (S.A.W.A.) da Ahlul Baiti (A.S.), sannan a ƙarshe wilayar Allah Madaukaki.

A cewarsa, hakkin mulki na asali da kansa na Allah ne, domin Shi ne Mahaliccin komai kuma Shi ne mai komai. Wilayar Manzon Allah (S.A.W.A.) da Imamai (A.S.) kuwa ta samo asali ne daga izinin Allah. Saboda haka, biyayya ga Allah, Manzo da Imamai tana cikin fahimtar tauhidi.

Hujjatul Turkashwand ya yi ishara da Hadisin Silsilatuz-Zahab na Imam Rida (A.S.), inda aka danganta furucin “La ilaha illallah” da sharaɗin wilaya, yana bayyana cewa karɓar wilayar Imam na daga cikin sharuddan cikar tauhidi.

Ya kuma bayyana cewa a lokacin ɓoyuwar Imam Mahdi (A.S.), musulmi ya kamata su koma ga malamai masu cikakken cancanta wajen fahimtar addini da jagoranci. A wannan mahanga, Wilayatul Faƙih ita ce ci gaba da wilayar Imam Ma’asumi, Manzon Allah (S.A.W.A.) da kuma wilayar Allah.

Ya ƙara da cewa karɓar Wilayatul Faƙih ba yana nufin cewa duk wanda ya ƙi hakan ya fita daga Musulunci ba; domin tauhidi da shirka suna da matakai daban-daban. Ya yi bayanin bambancin shirka bayyananniya da shirka ɓoyayya.

Dangane da tsarin siyasa, ya ce Jamhuriyar Musulunci ta Iran an kafa ta ne bisa wannan fahimtar tauhidi, kuma kuri’ar jama’a tana ba da karɓuwa da aiwatar da mulki a zahiri, amma tushen halaccin wilayar ya samo asali ne daga Allah.

Ya yi gargadi cewa bai kamata jami’an gwamnati su ɗauki ikon da suke da shi daga kuri’ar jama’a a matsayin ikon da ya yi daidai da ikon Waliyyul Faƙih ba. Ya kawo abin da ya faru da Abulhassan Bani-Sadr a matsayin misalin rikicin da zai iya tasowa tsakanin ganin cewa kuri’a ita ce tushen cikakken iko da kuma biyayya ga jagorancin addini.

A ƙarshe, Hujjatul Islam Turkashwand ya jaddada cewa imani da biyayya ga waliyyin Allah suna daga cikin abubuwan da ke taimaka wa mutum samun kyakkyawan ƙarshe a rayuwa. Ya kuma yi kira ga mutane da su kasance masu taka-tsantsan kada su kauce daga “hanyar haske”, wato tafarkin tauhidi da biyayya ga jagorancin addini.